Flora

Quien anda pul cunceilho puode-se ancantar culas sues peizaiges sien mancha i çcobrir un patrimonho natural sien pareilha, de marabilhas, que guarda ls sous ancantos, faborecendo la bida de ls animales i de las plantas de las arribas de l riu. Assi i todo, niun quadro ye purfeito sien nomear la plantas q’hai alhá, i ye l que bamos a fazer a seguir, yá que de l restro, la peizaige fala por eilha mesma:

Loinge de l alberoto de las grandes cidades, l cunceilho de Miranda de l Douro nun biu l sou patrimonho ser çtruído, seia l natural seia l houmano. Soubo guardar l saber-fazer tradecional i streformar las cousas bistas cumo malas – l eizolamiento, la ruralidade i la fraca acupaçon houmana – an cousas i cundiçones buonas, mormiente para quien, cansado de la bida i de l trabalho nas cidades grandes, deseia la calma, la tranquilidade, l çcanso i l la buona bida.

Quien chega al cunceilho de Miranda de l Douro ten a la spera un patrimonho natural i peizagístico formidable i legítemo, cun santuários de flora i de fauna, marabilhosas formaçones geológicas i geomorfológicas, l Douro Anternacional, santuários rupestres, las Arribas de l Douro – i lhinhas d’auga cun eicelentes cundiçones para atebidades de recreio. Un patrimonho cultural i eitnológico de grande balor, cun cuontas i tradiçones relacionadas culas romaries i las fiestas, cumo tal, la Fiesta de la Senhora de l Naso, la Fiesta de la Senhora de la Lhuç, la Senhora de l Monte, la Senhora de l Resairo, la Trindade i l San Juan de las Arribas; un patrimonho material rico i bariado, mormiente ls menumientos de la cidade i tamien ls de las fraguesies de l cunceilho, cula sue singeleza tradecional.

Stando cerca de la raia cun Spanha, puode-se inda topar ne ls lhugares raianos, pertueses i spanholes, ne ls caminos de quien besita l cunceilho.

L Cunceilho de Miranda de l Douro tem ua peizaige formidable, adonde abúltian:

Ls Carrascos Quercus Rotundifolia

Esta spece aparece an carrasqueiras i nas bordas, arrumada a las paredes. An giral cháman-se carrascos. Ls carrascos aparécen sien ser plantados ne l Praino Mirandés, chegando a crecer antre 7 i 10 metros d’altura. L sou fruito, la belhotra, ye buono para dar de quemer als cochinos

Ls sobreirales de Quercus Suber:

Ls sobreiros aperséntan-se ne l cunceilho cumo arbles de grande amportáncia eiquenómica i peizagística. Desta arble puode-se tirar la cortiça, la belhotra i la madeira. La belhotra sirbe para dar de quemer als cochinos i la cortiça sirbe para fazer rolhas i para eisolar. La madeira sirbe para la carpintarie i para fazer lhume. Ls más grandes sobreirales son an Fuonte Aldé (Cabeço de la Trindade), Palaçuolo i San Pedro de la Silba.

Ls Carbalhos – Quercus Pyrenaica:

Ls carbalhos nácen adonde quiera i son un patrimonho natural de muito balor.

Ténen amportantes funçones biológicas de cunserbar l meio ambiente, de biodebersidade, par’alhá de dáren lheinha.

Ls Niebros – Juniperus oxycedrus:

Esta arble aparece muita beç de a par cun outras, mormiente ls carrascos. Assi i todo, puoden-se ancuntrar cachos grandes adonde hai solo niebros. Estas formaçones son berdadeiras relíquias peizagísticas i acúpan las partes más calientes de las Arribas. Crécen debagar. Ls ólios de la madeira sírben para la medecina i para fazer perfumes. La madeira ye mui dura i sirbe para la carpintarie. Las bagas de l niebro sírben para poner n’augardiente.

Castanheiros i castanheiros brabos: Hai poucos ne l cunceilho i ls que hai ye na parte norte, que ye más alta.

L regulamento 2080/92 tem fazido cun que haba más castanheiros. Sírben para dar madeira i ls fruitos, las castanhas.

Freznos – Fraxinus augustifolia – ye un de ls brosques heigrófilos más amportantes, fazendo lhinhas nas bordas de ls lameiros tradecionales ou ne ls balhes más molhados i de tierra más fonda. Ten muita amportáncia ne ls lhameiros, mormiente an tiempos de sustento más scasso para ls animales.

Ls Amieirales – Alnus glutinosa

Ye ua spece ripícola q’aparece subretodo nas bordas de ls rius i ribeiros de l cunceilho. Dá ua madeira mui lhiebe, ousada an tiempos para fazer socas.

Ls salgueiros:

Aparécen ne ls rius i ribeiros, nas lhinhas d’auga que sécan ne l berano ou an beç de ls amieirales. Ten baixa bariadade florística i domina l Salix atrocinerea (borrazeira) i l salix salvifolia. Son amportantes para mantener las bordas de las lhinhas d’auga.

Speces d’arbustos:

Puoden-se ancuntrar bariadas speces d’arbustos: scobas, piornos, tumilho i xaras, de formaçon bariada i çfrentes cunsante ls causos.

Çcampados:

Ls çcampados son pastaiges naturales, para las canhonas pacéren.

Ténen grande bariadade d’yerbas, antre las quales se cuontan la Poa bulbosa i l trifolim subterraneum (trebo subterránio). Quando son bien pacidas, son un eisemplo buono d’aporbeitamiento sustentado de l meio.

Lhameiros:

Ls Lhameiros son balhes naturales, que sírben para las buiadas pacéren ou para fabricar feno. Las buiadas ándan alhá antre Júlio i Márcio.

Binhas:

Ne l Praino Mirandés, durante muito tiempo, la binha serbiu para dar bino que cad’un fazie para casa ou para pagar pequeinhos serbiços quando la torna jeira nun chegaba. Las binhas acupában las arribas i fabricában-se cun animales, mormiente ls burros.

La criaçon de la Zona Bitibinícola de l Praino Mirandés i alguns porgramas d’ajudas a la plantaçon, serbírun para melhorar la técnica de la binha, mormiente la culidade de las ubas que hai.