Passar para o Conteúdo Principal
Siga-nos

Fauna

L falar de la fauna puode-mos dar ua eideia más cierta de l que bamos a ancuntrar ne ls passeios puls termos i cumpletar l guapo retrato q’ampeçamos a fazer de l nuosso cunceilho.
La riqueza natural queda cumpleta culs muitos animales que scolhírun este sítio para bibir.
Nun ye a la suorte que Miranda de l Douro i ls cunceilhos bezinos son ls sítios par’adonde muita abe de rapina amenaçada i outras quaije zaparecidas se scapa i ben a fazer ls sous niales.
Na passaige de l tiempo, Miranda de l Douro soubo guardar un patrimonho natural i peizagístico formidable (mormiente la fauna i la flora), streformando, ne ls nuossos dies, l cunceilho nun paraíso ancantador para ls santidos. L spargir de la cultura eiquelógica zambolbiu la procura científica i ambiental d’acupaçon de ls tempos lhibres, a caras a ambientes morfológicos, de flora i de fauna bariados, oureginales i ricos i l cunceilho de Miranda stá purparado para respunder.
Respeitando la fauna, hai muita riqueza i bariadade, tamien de caça, ne l cunceilho.
An buona berdade, Miranda de l Douro ye l scundideiro de muita spece rala ou amenaçada, q’eiqui encontra buonas cundiçones para bibir i tener crias. D’antre eilhas, abúltian: la ciguonha negra, l’águila rial, l grifo, l alcaforro de l Angito, etc.
Hai tamien que falar nas ciguonhas que to ls anhos tórnan, na Primabera, culs sous niales ne ls campanairos de las eigreijas, ne ls chupones i telhados más altos, par’ende tenéren las sues crias i, anquanto nun se ban ambora al ampeço de l Outonho, ampréstan la sue grácia que bal la pena ber.
Cunceilho cun fuortes i antigas tradiçones, Miranda de l Douro ajunta, antre la natureza i la peizaige, balores de la sue própia rialidade – l Mundo Rural.
Nun tiempo an que cada beç más se búscan atebidades fuora de puortas, l cunceilho ten cundiçones para recebir de mui buonas i bariadas maneiras.
Miranda de l Douro ye ua tierra adonde la biodiversidade salta als uolhos. Ten la sue fauna quaije cumpleta. Ls ciguonha negra, l’águila de Boneli, l cochino muntés, l teixugo i l corço, antre outros, fazírun deste paraíso natural la casa deilhes.
Na tierra, ancuntramos peizaiges únicas, cun ribeiras i lhameiros adonde bíben las lhiebres, l gato brabo i l lhobo eibérico.
Ne l cielo, abierto i lhimpo, pintado cun un azul fuorte, bólan las ailas, las gralhas i ls alcaforros i, cumo nun podie faltar, las puntas más altas acuquelhados de niales de ciguonha.
L cunceilho de Miranda de l Douro ye un guapo resairo, que miles de retratos nun serien capazes d’arrecolher.
L cunceilho de Miranda de l Douro ten repuostas para aquemodar to ls santidos, daqueilhes que se bótan a búltio ne ls caminos deste mundo d’ancuontros. Quien anda çcansado pulas stradas de l cunceilho debrebe ancontra pastores guiando ls sous ganados ou homes que tórnan de ls termos, cun pordutos de la tierra. D’onde an onde, hai nórias antigas, paredes mociças de piedra cun sues canhiças i muita outra cousa que quien ande cun atento nun deixa scapar.
Peixes
Muito ribeiro i muita ribeira angórgan l Douro. Ne l riu hai muita bariadade de peixe. Las prancipales culidades q’ancuntramos ne l cunceilho son la carpa i l barbo, que dan para la pesca çportiba i para l turismo.
Apuis tamien podemos ancuntrar, nas augas de l riu i ribeiras de l cunceilho, la boga, l axigan, la perca-sol, l lúcio, la tenca i l scalo.
Caça
Neste canto scundido de l terrotório nacional, puode-se ber ua peizaige cun muita bariadade: son lhameiros, brosques, tierras sembradas, tierra aradas i tierras d’adil.
Miranda de l Douro oufrece als turistas i a la gente d’acá muita atraçon natural, para buonos sfergantes de çcanso i ancantamiento.
Por bias de la grande bariadade d’animales q’hai ne l cunceilho, la caça chama miles de pessonas de Pertual i de fuora.
Eiqui, la caça ye muita i bariada, an special l cuneilho, la lhiebre i la perdiç. Hai tamien muntaries als cochinos munteses i a las raposas.
Associaçones de Caça
  • Zona de Caça Associatiba de Miranda de l Douro
  • Zona de Caça Associatiba d’Augas Bibas
  • Associatiba de la Tierra Caliente Mirandesa
  • Associaçon de Caçadores de Cicuiro
  • Zona de Caça i Pesca Associatiba de Custantin
  • Zona de Caça Associatiba de Dues Eigreijas
  • Associaçon de Caça de Zenízio i Bilasseco
  • Associaçon de Caça i Pesca d’Infaneç/Pruoba/Paradela
  • Clube de Caçadores de Malhadas
  • Zona de Caça Associatiba de Palaçuolo
  • Zona de Caça Çportiba “Ls Gatones”
  • Associatiba de Peinha de l Puio
  • Associaçon Samartineira de Caça i Pesca
  • Assocaçon de Caça i Pesca de Sendin
  • Associaçon de Caça i Pesca de Silba
  • Assocaiçon de Caçadores de la Barceosa