Raças Outóctones
-
Raíç de la raça
L antrepassado serie l Bos Taurus Primigénius, oupenion que nun ye partelhada por Lima Pereira (1976), que dezie ser esta raça de raíç bariada, l que inda hoije se puode ber pulas sues çfréncias feno-genotípicas, de un cruzamiento de Bos Taurus Bragycerus cun Bos Taurus Primigénius. De 1955 anté 1972, la raça spargiu-se muito, alhargando l solar para Bumioso, Mogadouro, Bergáncia , Benhais i Macedo. Este spargir i l haber más cruzamientos fizo aparecer las raças Marinhoa i Maronesa. An 1870, la raça mirandesa acupa la más grande parte de l Alanteijo, pula sue grande capacidade de trabalho i pula sue carne, spargindo-se apuis por todo l Alanteijo, inda que ls muitos cruzamientos hában, pouco a pouco, acabado cula raça pura i lhebado a que houbissa menos cabeças.
Las rezones para haber tanta cabeça ne l Alanteijo serie que la raça d’alha percisaba de más mantenimiento que la raça mirandesa.
Zde 1865 q’hai prémios para la raça mirandesa, que passórun a ser apoiados pul goberno, cunsante l Decreto-lei nº 119 de 26 de Maio. An 1959, la Portarie nº 17132, de 22 d’Abril, çclarou l Lhibro Genealógico de la Raça Mirandesa, d’acordo cul Decreto nº 41109, de 14 de maio de 1957, que regula ls serbiços de reporduçon animal i l registro genealógico.
An 1989 criou-se l’Associaçon de Criadores de Bobinos de Raça Mirandesa, que ten, zde 1993, la respunsabelidade pul Lhibro Genealógico i pul melhoramiento de la raça. An 1994, fui-le dada la Denominação de Origem Protegida (DOP) a la “chicha mirandesa”, de ls cunceilhos de Bergáncia, Macedo de Cabaleiros, Bumioso, Mogaouro i Miranda de l Douro.
Classeficaçon i culidades de la raça
Ye ua raça braquicéfala, eumétrica, de perfil dreito ou cumo cóncaba.
Las culidades de la raça son:
- na cabeça, la parte de trás ancha, alhebantada i salida;
- marrafa spessa i lharga, tapando la raíç de ls cuornos i siempre de quelor aburmelhada;
- cuorno sbrancos cun puntas foscas, delgados i pequeinhos, cabanhos i de puntas rebiradas para riba i para fuora, quedando un cachico porriba KKKK
- la parte de drento de las oureilhas cun muito pelo lhargo i aburmelhado;
- cabeça d’uolhos abaixo, cúrtia, ancha i seca;
- canha de ls narizes dreita i çufino mui cúrtio, negro i arrodiado por ua borda de pelos siempre brancos;
- cachaço cúrtio, gordo, cun barbirlha q’ampeça lhougo apuis ls beiços de baixo i bai anté als zinolhos;
- l lhombo ye redondo, l cachaço baixo, l spenhaço dreito, cun risca aburmelhada ou sbranquiçada;
- nalgas abaladas, rabo alhebantado, cúrtio i bien serbido;
- las tetas bien puostas i bien zambolbidas, cun tetos buonos i bien puostos;
- patas cúrtias i delgadas abaixo de l zinolho;
- las patas de trás dreitas i las de la frente culs zinolhos zbiados al para drento i ls quartos al para fuora;
- quelor castanha retinta ne ls buis i castanho más ou menos scuro, cun tandéncia centrífuga ne ls buis i nas bacas;
- son animales anquelibrados, cun feitiu bibo mas mansos;
- tamanho grande i mociço, de tipo respiratório (l peito más ancho que la barriga)
L Cuncurso Nacional de Bobinos de Raça Mirandesa fai-se to ls anhos an Miranda de l Douro die 24 de Júlio.
Associaçon de Criadores de Bobinos de Raça Mirandesa
Posto Zootécnico de Malhadas
5210-150 MALHADAS
e-mail: mirandesa@mail.telepac.p
Tel. 273 438120
Fax. 273 438121 -
Raíç de la raça
Diç que las canhonas de la Raça Churra Galhega Mirandesa ténen relaçones filogenéticas cul Ovies Aries Studery. Hai cientos d’anhos que se crían canhonas ne l Praino Mirandés. Ne l purmeiro censo fazido a nible nacional, an 1980, adonde se fazie la debison an trés culidades: L Bordaleiro (culas subculidades Feltroso, Churro i Quemun), l Merino i l Stambrio, se falaba para Trás ls Montes de ls Bordaleiros Quemunes de l Praino de Miranda de l Douro.
Segundo Bernardo de Lima (1873), ne l Praino Mirandés habie las oubeilhas Churras Galhegas Mirandesas. Amentaba-se anton an Trás ls Montes na sub-raça Bordaleira Churra cun: “buona aplicaçon andustrial, quier dezir, sastifai las trés cousas que se le píden: dar lhana, chicha i stierco...”.
La maneira d’andar culas canhonas era la tradecional: “bíben de nuite i de die ne l termo, drúmen ne l chequeiro para deixar l stierco na tierra... “ (Ortigosa, 1926)
Classeficaçon i culidades de la raça
Cabeça an giral al cumprido, afilada i sien lhana; solo los machos ténen cuornos de feitiu anroscado i triangularls uolhos ténen tamanho médio cun manchas castanho scuro ou negras alredror, manchas que tamien ténen alredror de las oureilhas i de ls beiços.
L cachaço ye lhargo, mas pouco ancho, mal anganchado ne l cuorpo, todo tapado cun lhana. L cuorpo ye streito i pequeinho, cun costielhas pouco drobadas, garrote pouco salido i las spaldas aparchacadas, la parte traseira cúrtia, çcaída i rabo lhargo.
Las tetas son an balon, cun tetos bien puostos.
Las patas son cúrtias mas fuortes, spintalgadas, assi cumo las unhas, que son rijas i de tamanho médio, sien lhana.
La piel ye delgada i gordurenta, branca ou a dar al amarielho. L beldre ye grande i pesado, cun melenas lhargas i aguçadas.
Son animales rijos, bien amanhados para l meio adonde bíben. L nome de la raça ben de nome de la tierra.
Las canhonas de Raça Churra Galhega Mirandesa son animales pequeinhos, cun pouco cuorpo, mas an pagas ténen l beldre grande, bien pesado i lhana de buona culidade.
Quando yá stan criados, cómen l que ancóntran puls termos – lhameiros, restolhos i baldius – i ferranhas sembradas.
Ls cordeiros cómen l lheite de las mais, acrecentado cun feno, abena i centeno apuis de las dues ou trés semanas
Pordutos de la raça
Para alhá de la chicha tenra i saborosa, grácias al que cómen, a las cundiçones de la region mirandesa i a la maneira cumo son criados, tamien dan buona lhana. Cula lhana fáien-se artigos de artesanato de la region, por ser áspara, de pelos lhargos i cun un brilho i toque que la baloriza.
L Cuncurso Cuncelhiu d’Oubinos de Raça Churra Mirandesa fai-se to ls anhos an Miranda de l Douro durante l més d’Abril.
-
Culidades de la raça
Animales bien amanhados, cun bun curpo i rijos
Altura média, anté l garrote: >1,20 m (l’altura requemendada ye 1,35 m). Pelo castanho scuro, más claro nas cuostas i na barriga; branco ne l çufino i alredror de ls uolhos; ténen muito pelo, lhargo i gordo, mormiente ne l lhombo, cabeça, antre las piernas de la frente, alredror de las oureilhas i punta de las patas; crina cun muito pelo i sien sinales.animales mansos;
cabeça grande i dreita;
cara ancha i un cachico al para drento ne l meio, cun muito pelo (chegando a fazer-se ua spece de franja subre la cara)
Uolhos salidos; cara cúrtia de chanfro ancho;
Canal antre ls queixales ancho, beiços gordos i fuortes;
Oureilhas grandes i anchas, cun muito pelo na parte de andrento, redondas na punta (fazendo ua spece de borla) i çcaídas para la frente;
Uolhos pequeinhos, que le dan un calatriç triste;
Cachaço cúrtio i gordo; garrote baixo i pouco salido; lhombo dreito, cúrtio i fuorte;
Peito ancho cun canha al para fuora
Costielhas ancurbadas
Nalgas más alhebantadas que l garrote;
Spaldas cúrtias i bien zambolbidas, algo çcaídas;
Barriga taluda. Patas gordas culs zinolhos grandes, cun pelo a cubrir las caçcanhetas;
Patas de trás un cachico stendidas i metidas al para drento;
Caçcanhetas grandes. Çancadas lhargas mas bagarosas, pouco listas.
Esta spece ye usada muita beç, por bias de séren buonos a puxar, para andar de a cabalho neilhes i podéren lhebar carga ne l lhombo (a las bezes de parailha cun mulas i machos) ..... i para ls trabalhos tradecionales puls termos (pastoreio, cultura de cereales... )
Culidades genéticas
Ls burros de Miranda son rijos, sossegados, bíben muitos anhos i sírben para ajudar an muitos trabalhos. Son fuortes i mansos.
Ls burros mirandeses amánhan-se bien cul clima de la region, pus ténen la capacidade de s’aguantar cun pouco que pacer i pouca auga.
Estas raças stan purfeitamiente antegradas na “Tierra Frie de l Planalto”, region d’agricultura probe, cun grandes bariaçones de temperatura durante l anho i pouca chuba (arrimado a 600 mm).
Pordutos de la raça
Para alhá de l’ajuda dada ne ls trabalhos agrícolas, la raça ten sido ousada cumo porduto turístico, cumo ajuda para curar ciertas malinas (asinoterapie), para ajudar al zambolbimiento rural, ajudando tamien a mantener las pessonas ne ls lhugares, culas atebidades turísticas, recreatibas i culturales, mormiente naqueilhas abarcadas pul turismo rural.
Ls burros stan associados a muitos saberes de la gente de l Nordeste Stramuntano. Son eilhes l beno que mos acerca to ls dies a las tradiçones i conhecimientos que se cuntínan a perder a cada die que passa.
Aoociação para o Estudo e Proteção do Gado Asinino
Rue de la Scuola Purparatória, casa de la Junta de Fraguesie
5225 – 909 - Sendin
e-mail: aepga@aepga.pt
Tlm. 96 6151131 • 91 4093724
